“BREZ PAS BREZI” për folklorin shqiptar në Shkup (FOTO)
Këtyre ditëve në Shkup është mbajtur Festivali folklorik për fëmijë BREZ PAS BREZI – Shkup 2018. Ajo përkoi me rastin e Ditës ndërkombëtare të vallëzimit, pikërisht më 29 prill. Defileja vijoi nga kompleksi Çairçanja drejt sheshit Skënderbeu, duke kaluar nëpër rrugët e Çarshisë shoqëruar me këngë, valle, surle e tupanë.
Ngjarja qendrore u mbajt në sheshin Skënderbeu, nën praninë e shumë mysafirëve dhe artdashësve. Organizatorë e evenimentit ka qenë Ansambli ILIRIDA – Shkup, ndërsa Festivali ka pasur karakter garues. Me 18 çifte, festivalin e hapën valltarët e Ansamblit ILIRIDA me vallen KOSOVARE, ndërsa fjalë përshëndetëse kishte kryetari i Ansamblit ILIRIDA, Rufki Loki. Fjalë rasti patën edhe kampioni olimpik Shaban Tërstena, Agim Rexhepi – nga Shoqata Miqtë e Amerikës si dhe Dejto Morina- kryetari i Esnafit të Çarshisë.
Drejtori i Festivalit Ilir Loku, njëherësh valltar dhe koreograf në Ansamblin ILIRIDA, i cili e bëri hapjen solemne të Festivalit tha se ardhmëria e një kombi varet nga investimi i tij në kulturë.
“Duke e pa mungesën e Festivaleve për fëmijë vendosëm që ta lindim këtë festival pikërisht më 29 prill, ku njihet si Dita ndërkombëtare e vallëzimit. Kjo ditë do të festohet edhe në qytetin tonë me këngë e valle popullore. Ardhmëria e një kombi varet nga investimi i tij në kulturë, andaj investoni nëpërmjet fëmijëve tuaj në kulturë”, tha Loku.
Në Festivalin me perfomancat e tyre morën pjesë gjithsej 7 Ansamble edhe atë: Ansambli “Dëshmorët e Kombit”- Obiliq, Ansambli “Bajram Shabani”-Kumanovë, Ansambli “Kemajl Azizi”-Viti, Ansambli “Xheladin Zeqiri”-Tetovë dhe Shoqëria Kulturore artistike “Shqiponja”-Saraj. Ansambli “ILIRIDA” ka qenë nikoqire si dhe Ansambli “Emin Duraku” si mysafir special.
Ndërkaq, çmimet u kanë takuar Ansambleve që më mirë performuan dhe joshën publikun, ku vendi i parë apo çmimi special iu nda SHKA “Shqiponja”-Saraj. Vendi i dytë shkoi për Ansamblin “Bajram Shabani”-Kumanovë, ndërsa vendi i tretë për Ansamblin “Xheladin Zeqiri”-Tetovë. Koreografia më e mirë shkoi për Ansamblin “Dëshmorët e Kombit”- Obiliq, kostumografia më e mirë: Ansambli “Xheladin Zeqiri”-Tetovë, Ansambli më i kompletuar: Ansambli “Dëshmorët e Kombit”- Obiliq, ndërsa çmimi i publikut i takoi Ansamblit “Kemajl Azizi”-Viti.
Defileja më e mirë ka qenë nga Ansambli “Kemajl Azizi”-Viti, valltari më i mirë Leart Grajqevci – nga Ansambli Dë shmoret e Kombit – Obiliq, derisa valltarja më e mirë u shpall Jonila Memeti – nga Ansambli Bajram Shabani – Kumanovë. Juria ka qenë e përbërë nga tre anëtarët, Gëzim Alimehmeti nga Tirana, Haki Mulliqi nga Prishtina dhe Fadil Zeneli nga Shkupi.Në këtë ngjarje morën pjesë edhe shume figura të njohura të sportit, artit, kulturës, arsimit, Shoqata të ndryshme.
Pas mbarimit të festivalit u shtrua edhe një darkë për mysafiret ku dhe u ndanë mirënjohje për pjesëmarrësit dhe sponsorët e këtij Festivali. Ndryshe, Festivali është mbështetur nga Ministria e Kulturës, Komuna Çair, Esnafi i Çarshisë, Mc Endriti, Restorant LUXOR, Restorant Living In, BE-SA Junior, Tera Fast Food, Tëo Brothers-B2, Foto Studio XS, Restorant BENI, TVM2, Tv Shenja, Alsat-M, Tv 21 dhe Radio Shkupi.